Follow the best medical aid in the industry on facebook

Energie vir ’n suksesvolle wedloop – Voedingswenke aan jou gebring deur Medihelp & Montagu Dried Fruit and Nuts

  •   by Medihelp
  •   17 Februarie 2017
  •   400 view(s)

Jy’t geoefen soos ’n kampioen en jou liggaam is sterk en reg om die groot wedloop aan te pak. Nou moet jy net sorg dat jy deurlopend gesonde energie aan jou liggaam voorsien sodat jy die pas kan volhou. Hier’s ’n paar maklike, lekker voedingswenke wat jy draf-draf kan probeer.

  1. Proteïen en vet help jou liggaam om volhoubare energie te genereer. Neute bevat baie proteïen en goeie vette, en in matige hoeveelhede (30 g-porsies) bied dit ’n gesonde energiehupstoot.
  2. As jy vir langer as 75 minute gaan draf, sal jy jou energievlak moet aanvul. Droëvrugte en neute is lig, maklik om saam te dra en het ’n hoë voedingsdigtheid, wat dit die ideale happie by die halfpadmerk maak.
  3. Probeer om jou energievlak aan te vul binne die “glikogeen-hersteltyd” 30 tot 60 minute ná ’n wedloop. Dis dan wanneer jou liggaam dit die meeste nodig het om spierweefsel te herstel en sy glikogeenvoorraad aan te vul. Eet ’n gebalanseerde mengsel van koolhidrate met ’n bietjie vette en proteïen.
  4. Neutbotter is ’n uitstekende bron van proteïen en vet. Eet een middelgrootte piesang en een eetlepel neutbotter sowat ’n uur voor jou wedloop begin. Die kalium en vog in die vrug sal help dat jy gehidreer bly terwyl die vette en koolhidrate in die neutbotter gesond is vir jou hart.
  5. Jy het gesonde vette nodig as jy vir ’n wedloop voorberei. Talle atlete sukkel met ’n omega 3-wanbalans, wat hulle vatbaar maak vir inflammasie, infeksies en verswakte weerstand. Probeer om meer omega 3 in te neem deur olierige vis soos salm, makriel, haring, sardiens en bokkoms te eet. Die olie in vlassaad, hennepsaad, olywe, olyfolie en avokado is ook ’n waardevolle bron van gesonde vette indien dit saam met olierige vis ingeneem word.
  6. Kokosneutwater is ’n uitstekende opkikker tydens ’n wedloop. Dis baie gewild omdat dit ’n optimale bron van die Groot Vyf-elektroliete is: kalsium, natrium, magnesium, kalium en fosfor. Dis ook makliker verteerbaar as die meeste sportdrankies.
  7. Dit is bewys dat rosyne net so doeltreffend soos sport-jellieboontjies werk tydens kardio-oefeninge om jou uithouvermoë te verbeter. Rosyne bevat baie kalorieë, wat jou energie ’n natuurlike hupstoot gee.
  8. Peusel gerus aan ’n paar dadels tydens ’n marathon. Dis maklik om te kou en bevat meer eenvoudige suikers en koolhidrate as ander gedroogde vrugte. Dis ook ’n goeie bron van kalium. Drie dadels is gelykstaande aan een porsie.
  9. Probeer om nie kort voor of tydens die wedloop iets te eet waaraan jou liggaam nie gewoond is nie. Dit kan naarheid en/of krampe veroorsaak. As jy ’n nuwe kossoort of aanvulling by jou roetine wil voeg, doen dit geleidelik sodat jou liggaam tyd het om daarby aan te pas. Moet nooit aanvullers neem sonder om eers jou dokter of ’n gekwalifiseerde sportvoedingkundige te raadpleeg nie.
  10. Sorg dat jy jou spiere beskerm deur behoorlik op te warm voordat jy gaan draf en ná die tyd strekoefeninge te doen.

Drawwers is deeglik bewus van die toewyding en ywer wat nodig is om wedloopfiks te bly. Verbind jou daartoe om jou liggaam gesond te hou deur jou oefenroetine aan te vul met gesonde eetgewoontes en genoeg tyd toe te laat om te rus sodat jou liggaam kan herstel na ’n taai wedloop.

"Alle drawwers weet dat draf meer is as net om een voet voor die ander te sit; dis ’n leefstyl en dis wie ons is." – Joan Benoit Samuelson
Load more comments
Thank you for the comment! Your comment will be displayed to others, once it has been approved.
New code
comment-avatar

 

speak to an accredited adviser

Please complete the fields below and we will phone you back with accredited advice

GO