Follow the best medical aid in the industry on facebook

Fetale alkoholsindroom: Voorkombaar maar onomkeerbaar

  •   by Medihelp
  •   18 Oktober 2016
  •   387 view(s)

Elke jaar op 15 Oktober is dit Nasionale Fetale Alkoholsindroom-dag. Dis wat jy oor hierdie voorkombare maar onomkeerbare siekte moet weet.

Wat is fetale alkoholsindroom?
Vroue wat alkohol drink tydens hul swangerskap kan geboorte gee aan babas met fetale alkoholspektrumafwykings (ook bekend as FASA). FASA is die oorkoepelende term vir ’n reeks afwykings wat gering of ernstig kan wees en fisieke en verstandelike geboortedefekte kan veroorsaak. Tipes FASA sluit in –
  • fetale alkoholsindroom (FAS),
  • gedeeltelike fetale alkoholsindroom,
  • alkoholverwante geboortedefekte,
  • alkoholverwante neuro-ontwikkelingsafwykings, en
  • neurogedragsafwykings wat met prenatale alkoholblootstelling verband hou.

Fetale alkoholsindroom (of FAS) is ’n ernstige vorm van die toestand. Mense met FAS kan sukkel met hul visie, gehoor, geheue, aandagspan en die vermoë om te leer en te kommunikeer. Alhoewel die defekte verskil van persoon tot persoon, is die skade gewoonlik permanent.


Wat veroorsaak fetale alkoholsindroom?
FAS word veroorsaak deur ’n vrou se gebruik van alkohol tydens haar swangerskap. Die alkohol wat ’n swanger vrou drink, vloei in die bloedstroom deur die plasenta na die fetus of groeiende baba. Omdat alkohol stadiger deur die fetus se klein liggaam afgebreek word, is die alkoholvlak in die fetus se bloed hoër as in die ma se bloed en bly die alkohol ook vir langer in die fetus se bloedstroom. Hierdie blootstelling van die fetus aan alkohol veroorsaak FAS.

Vroue wat gereeld drink (vier of vyf alkoholiese drankies of meer per dag) verhoog die kanse dat hul babas FAS sal hê drasties. Maar geen hoeveelheid alkohol wat gedurende swangerskap ingeneem word, is as veilig bewys nie. Die gevolge van FAS kan ook gesien word in kinders wie se ma’s net matig of lig drink tydens swangerskap. Deur gemiddeld net een drankie per dag te drink, verhoog ’n baba se risiko vir FAS.

Wat is die simptome van fetale alkoholsindroom?
Aangesien FAS ’n wye reeks probleme veroorsaak, is daar heelwat moontlike simptome. Die erns van dié simptome wissel van gering tot straf en kan die volgende insluit:
  • ’n Klein kop
  • ’n Gladde rif tussen die bolip en die neus, smal oë wat wyd uitmekaar sit, ’n baie dun bolip, of ander abnormale gelaatstrekke
  • Ondergemiddelde lengte en gewig
  • Hiperaktiwiteit
  • ’n Gebrek aan fokus
  • Swak koördinasie
  • Vertraagde ontwikkeling en sukkel om te dink, praat, beweeg asook met sosiale vaardighede
  • Swak oordeel
  • Probleme met sig of gehoor
  • Leerprobleme
  • Intellektuele onvermoëns
  • Hartprobleme
  • Nierdefekte en -afwykings
  • Deformiteite van die ledemate of vingers
  • Gemoedskommelings.

Kan fetale alkoholsindroom behandel word?
FAS is behandelbaar maar onomkeerbaar. Alhoewel FAS ongeneeslik is, kan kinders wat vroegtydig gediagnoseer word – verkieslik voor skoolgaande ouderdom – die toestand beter bestuur deurdat hul opvoeding van jongs af aangepas word sodat hulle hul optimale potensiaal kan bereik.

Hoe kan fetale alkhoholsindroom voorkom word?
Swanger vroue kan FAS voorkom deur geen alkohol tydens hul swangerskap te drink nie. Die gevolge van ligte alkoholinname af en toe voordat ’n vrou besef sy is swanger, is nie bekend nie. Omdat geen hoeveelheid alkohol tydens swangerskap as veilig bewys is nie, behoort ’n vrou wat vermoed dat sy swanger is dadelik op te hou drink. Vroue wat probeer om swanger te raak, moet ook alkohol vermy. Dit geld vir alle tipes alkoholiese drankies, insluitend bier, wyn en sterk drank (soos whisky, vodka, tequila, jenewer en rum).

Daar is geen bewyse dat ’n pa wat drink FAS by sy kind kan veroorsaak nie. Mans kan hul vroue egter help om alkohol tydens hul swangerskap te vermy deur self ook op te hou drink.

Bronne: www.healthline.comwww.webmd.com
Load more comments
Thank you for the comment! Your comment will be displayed to others, once it has been approved.
New code
comment-avatar

 

speak to an accredited adviser

Please complete the fields below and we will phone you back with accredited advice

GO