Follow the best medical aid in the industry on facebook

Soepel vir die nuwe jaar

  •   by Medihelp
  •   11 Januarie 2016
  •   331 view(s)
Die lewe is gejaagd, en oefening en ontspanning bly dikwels eerste in die slag wanneer ons tyd moet maak vir alles wat ons moet doen.
Studies dui egter aan dat so min as 25 minute se oefening per dag en die regte hoeveelheid slaap jou lewensverwagting kan verbeter en jou kan help om jonk te bly.

Met die nuwe jaar behoorlik op dreef gaan dié wenke jou help om fisiek en geestelik op jou beste te wees.

1. Soos ’n vis in die water
Het jy al ooit iemand dopgehou wat met soveel gemak swem dat dit lyk of hulle moeiteloos deur die water gly?

Jy kan ook leer om dit te doen – selfs al is jy nie van nature ’n swemmer nie. Die Amerikaanse swemafrigter Terry Laughlin het ’n nuwe swemstyl ontwikkel wat hy totale indompeling (total immersion swimming of TI) noem, met die hooffokus om swemmers te leer om op die doeltreffendste wyse deur die water te beweeg.

TI doen dit deur op balans en vaartbelyning in die water te fokus sodat jy die energie wat vir aandrywing nodig is, optimaal kan gebruik. As jy vaartbelyn is, gebruik jy heelwat minder energie om waterweerstand te oorkom – een van die belangrikste redes waarom swemmers sukkel en moeg word.

Dié manier van swem blyk ook voordelig te wees vir driekampatlete, wat vind dat hulle minder moeg voel ná hulle die swemgedeelte van die driekamp voltooi het en dus meer energie vir die fietsry- en drafgedeelte het. Die TI-metode deel baie van die bewustheidsbeginsels van joga en Tai Chi.

2.Siësta sonder skuldgevoel
In antieke Rome het almal elke middag ’n uiltjie geknip – dit was die sogenaamde sesde uur van die dag wat hulle sexta genoem het en waar die woord siësta vandaan kom. Die Romeine het iets beetgehad.

Volgens navorsing is die voordeligste slaappatroon vir mense verlengde slaap deur die nag met ’n middagslapie bedags. ’n NASA-studie het bevind dat ’n 40-minute-slapie jou wakkerheid met 100% kan verhoog.

 Ander navorsing het bevind dat ’n slapie van 20 minute voordeliger vir jou wakkerheid is as oefening of 200 mg kaffeïen – ongeveer twee tot drie koppies koffie. Terwyl jy slaap, skei jou liggaam groeihormone af wat jou immuunstelsel versterk, stres verminder en spierherstel en gewigsverlies aanhelp. Tydens ’n slapie is die serotonienvlak in jou brein ook hoër, wat help om jou gemoed te verbeter en ’n positiewe lewensuitkyk bevorder 

Gaan dus voort en geniet ’n siësta sonder om skuldig te voel – jy is in die goeie geselskap van
bekendes soos Winston Churchill, Albert Einstein en Thomas Edison. 

Het jy al by HealthPrint aangesluit?
HealthPrint is 'n gratis aanlyn welstandsprogram. Met HealthPrint kan jy jou gesondheidsaktiwiteite monitor, toegang kry tot gesondheidsinligting en besonderhede van jou voordele, en die waarde geniet wat ons talle vennote jou bied.

3. Voetslaan na ’n langer, gesonder lewe
Navorsing wat onlangs by ’n kongres van die Europese Kardiologievereniging voorgehou is,
dui daarop dat jy tussen drie en sewe jaar by jou lewe kan voeg deur vir 25 minute lank flink te stap, en dat matige stapoefening die risiko van noodlottige hartaanvalle vir mense tussen die ouderdom van 50 en 60 jaar kan halveer.

Dis nooit te laat om te begin nie: Ander studies toon dat mense wat op 70 met ’n oefenroetine begin, minder geneig is om atriale fibrillasie te ontwikkel – ’n versteuring van die hartritme
wat by ongeveer 10% van alle mense bo 80 voorkom.

Maak seker dat jy flink stap – die tempo waarteen jy stap, bepaal die mate van die gesondheidsvoordeel wat jy daaruit kry. Navorsing deur die Lawrence Berkly Nasionale Laboratorium in die VSA dui daarop dat die flinkheid waarmee jy stap deurslaggewend is vir
die bevordering van jou gesondheid, daarom moet jou staptempo geleidelik verhoog tot 6,5 km per uur as jy dit nie reeds doen nie.

Stap help ook om bene te versterk deur hul digtheid te verhoog, en dit help weer om osteoporose te voorkom. Dit behoort genoeg motivering te wees om in ’n goeie paar drafskoene te belê en die pad aan te durf.

4. Koffie en oefening is goeie maats
Op soek na ’n opkikker voor jy gaan oefen? Geniet dan gerus ’n koppie koffie. As jy koffie drink voordat jy oefen, word jou liggaam aangespoor om vetselle vir energie te verbrand – wat gesonde gewigsverlies bevorder.

Kaffeïen help ook om jou metabolisme te verhoog sodat jy meer kalorieë tydens jou oefensessie verbrand. Navorsing deur die Universiteit van Illinois het voorts ook bewys dat kaffeïen spierpyne tydens oefening kan verminder.

 ’n Koppie sterk, swart koffie lewer die beste resultate, maar onthou dat matigheid belangrik is. Die meeste studies dui aan dat jy met ’n geruste hart drie tot vier koppies koffie per dag kan drink, maar meer as vier koppies (ongeveer 300 mg kaffeïen) kan jou angstig en
senuweeagtig laat voel.

Te veel koffie kan jou selfs hartkloppings en maagpyn gee.

5. Touspring: vetverbrander van formaat
Touspring is een van die doeltreffendste maniere om behoorlike kardiovaskulêre oefening te kry. Dit is ook baie gerieflik en jy benodig slegs ’n liggewig springtou en genoeg spasie om te kan touspring.

Dis veral voordelig as jy reis of nie toegang tot oefengeriewe het nie. Beginners moet onthou om die voete bymekaar te hou, die knieë effens te buig en die kop omhoog te hou. Moenie hoër spring as wat nodig is om die tou onder jou voete deur te laat nie. Land sag en probeer om nie terug te skop nie – dit maak die gespring minder doeltreffend en verhoog knersing op jou gewrigte.

Verwante artikels:
Gereelde ondersoeke is noodsaaklik vir goeie gesondheid

Vyf nuttige apps wat jou gesonder hou

Gehalte gesondheidsorg teen ’n bekostigbare prys

Load more comments
Thank you for the comment! Your comment will be displayed to others, once it has been approved.
New code
comment-avatar

 

speak to an accredited adviser

Please complete the fields below and we will phone you back with accredited advice

GO