Follow the best medical aid in the industry on facebook

COVID-19-inenting – die nuutste inligting Julie 2021

President Cyril Ramaphosa het op 27 Junie 2021 aangepaste vlak 4-inperkingsregulasies aangekondig weens die groeiende getal COVID-19-gevalle wat tydens die derde vlaag infeksies aangeteken word. Dit is dus nou meer as ooit belangrik dat almal voortgaan om die protokolle vir sosiale distansiëring te volg, publieke saamtrekke te vermy, altyd ons maskers in die openbaar te dra en gereeld ons hande te ontsmet, aangesien ons almal vatbaar vir die virus is. Hierdie voorsorgmaatreëls bly noodsaaklik, selfs nadat jy teen COVID-19 ingeënt is.

Die inentingsproses is op dreef en ons gee hieronder meer inligting oor hoe die program verloop. Onthou dat inenting teen COVID-19 vrywillig is en dat dit jou keuse is om ingeënt te word of nie.

Alle Suid-Afrikaners wat kies om die inenting te ontvang, ongeag of hulle lede van mediese skemas is, moet dieselfde registrasieproses volg soos voorgeskryf deur die departement van gesondheid.

Fase 1

Fase 1 van die inentingsprogram het op 15 Mei 2021 geëindig en sowat 500 000 gesondheidsorgwerkers is gedurende hierdie fase ingeënt.

Fase 2

Hierdie fase het op 17 Mei begin en fokus op die sowat 600 000 gesondheidsorgwerkers wat nog die inenting moet ontvang saam met ongeveer 16,5 miljoen ander Suid-Afrikaners, insluitend 60-plussers, kwesbare individue en mense in afgebakende gemeenskappe.

Die inentingsprogram is intussen uitgebrei om ook onderwysers in te sluit, wat gedurende die Julie-skoolvakansie ingeënt sal word.

Vanaf 1 Julie 2021 is die registrasieproses ook oop vir almal wat 50 jaar en ouer is.

Lede in hierdie ouderdomskategorie kan vanaf 1 Julie op die departement van gesondheid se Elektroniese Inentingsdatastelsel (EVDS) registreer en sal vanaf 15 Julie begin om hulle inentings te kry.

Indien jy ingeënt wil word, klik op die skakel hier onder om te registreer:

Registreer hier om die COVID-19-inenting te kry

Die volgende alternatiewe registrasiemetodes is ook beskikbaar:

  • Stuur die woord “Register” na die WhatsApp-nommer 0600 123456 en volg die aanwysings;
  • Registreer via SMS deur *134*832# te skakel; of
  • Skakel die COVID-19-hulplyn by 0800 029 999.

Sodra jy geregistreer het, sal die proses verder só verloop:

  • Jy sal ’n SMS ontvang wat bevestig dat jy suksesvol op die stelsel geregistreer is.
  • Jy sal ’n opvolg-SMS ontvang met besonderhede van –
    • jou registrasiebewysnommer;
    • die geskeduleerde dag en tyd vir jou inenting; en
    • die inentingslokaal (naby jou huis of werk, soos jy tydens die registrasieproses aangedui het). Hou in gedagte dat daar nog heelwat gesondheidsorgwerkers is wat ingeënt moet word en dat jy dalk ’n rukkie sal moet wag voordat jy hierdie SMS ontvang.
  • Moet asseblief nie na ’n inentingslokaal gaan tensy jy per SMS versoek is om daar te rapporteer en jou registrasiebewysnommer ontvang het nie. Hoewel daar plekke is wat mense sonder ’n afspraak aanvaar, is dit beter om te wag totdat jy ’n afspraak het.
  • Wanneer jy die lokaal besoek soos in jou SMS aangedui, moet jy asseblief jou ID-dokument en Medihelp-lidmaatskapkaart saamneem, asook die registrasiebewysnommer soos in die SMS bevestig is.
  • Indien jou inenting twee dosisse benodig, sal jy ’n tweede datum per SMS ontvang wanneer jy die volgende dosis sal kry.
  • Die inentingsentrum sal die koste van die entstof en die vasgestelde toedieningsfooi van Medihelp eis en daar sal nie van jou verwag word om enige betaling ten opsigte van die inenting te maak nie.

Tans mag net die departement van gesondheid COVID-19-entstowwe aankoop en dit na die geakkrediteerde inentingsplekke in die staat- en privaat sektor versprei soos nodig. Om te sien waar die staats- en privaat inentingslokale geleë is, klik hier.

Indien jy verkies om by ’n Dis-Chem-fasiliteit ingeënt te word, kan jy hier klik om ’n afspraak te maak. Jy benodig jou EVDS-registrasienommer om ’n inenting by ’n Dis-Chem-apteek te kan bespreek. Dis-Chem sal dan ’n eis vir die entstof en die toediening daarvan by Medihelp indien.

Die regering het aangedui dat daar voldoende entstof bekom is om 41 miljoen Suid-Afrikaners teen die einde van 2021 in te ent.

Suid-Afrika het 21,4 miljoen dosisse van die Pfizer-BioNTech-entstof (wat twee inentings per persoon vereis) en 31,2 miljoen dosisse van die Johnson & Johnson-entstof (wat ’n enkeldosisentstof is) aangekoop.

Medihelp sal die koste van die COVID-19-entstof en die toediening daarvan ten volle betaal, aangesien dit vir VMV kwalifiseer. Ons sal ’n rekening ontvang van die inentingsentrums waar lede ingeënt is.

Dit is raadsaam om 14 dae te wag tussen die griepinenting en die COVID-19-inenting.

Die regering sal amptelik afkondig op watter datum Fase 3 van die inentingsprogram begin en Medihelp sal lede dan in kennis stel sodra die afkondiging gepubliseer is. Jy kan die nuutste inligting oor registrasie lees op die Elektroniese Inentingsdatastelsel (EVDS) se selfregistrasieportaal by https://www.gov.za/covid-19/vaccine/evds.

Entstowwe leer jou immuunstelsel hoe om jou liggaam te beskerm teen ’n siekte waaraan dit nog nie voorheen blootgestel was nie. Wanneer jou liggaam dan die siekte opdoen, weet dit hoe om daarteen te veg, jou risiko vir ernstige simptome is laer, en jy sal vinniger herstel as sonder ’n inenting.

Nee. Ons moet voortgaan om al die veiligheidsmaatreëls toe te pas, soos om maskers te dra, totdat die regering aandui dat dit nie meer nodig is nie.