Gapingsdekking: Wat jy moet weet

Nina, ’n 35-jarige ma van twee, het onlangs ’n blindedermoperasie gehad. Die totale rekening vir die prosedure, insluitend die chirurg se fooie, narkotiseur en hospitaalverblyf, was R40 000.

Nina se mediese fonds het R25 000 gedek, volgens die mediesefondstariewe, wat haar met ’n tekort van R15 000 gelaat het.

Nina se gapingsdekking het die R15 000 verskil betaal, en dit was dus nie nodig dat sy haar spaargeld gebruik om die tekort te dek nie. Danksy gapingsdekking kon Nina daarop fokus om aan te sterk sonder om haar oor onverwagte rekeninge te bekommer.

Oorbrug die gaping wanneer dit by mediese uitgawes kom

Gapingsdekking is 'n soort versekering wat jou help om tekorte in jou mediese dekking te bestuur. Dit word egter dikwels oorgesien. Selfs al het jy ’n omvattende mediesefondsplan kan sommige behandelings meer kos as die dekking wat jou mediese fonds bied, wat beteken dat jy vir die verskil verantwoordelik sal wees. Gapingsdekking oorbrug hierdie finansiële gaping.

Moenie dat onverwagte mediese rekeninge jou onkant vang nie

Dokters, spesialiste en hospitale se fooie is dikwels meer as wat mediese fondse dek. Spesialiste kan byvoorbeeld 200% of 300% van mediesefondstariewe vra, terwyl jou mediese fonds dalk net tot 100% of 150% dek. Sonder gapingsdekking sal jy self die verskil moet betaal, wat groot bedrae kan beloop.

Gapingsdekking verseker dat jy nie onkant betrap word deur onverwagte mediese rekeninge ná ’n hospitaalverblyf, operasie of spesialisbehandeling nie.

’n Bykomende laag beskerming

Gapingsdekking werk saam met jou mediesefondsplan. Dit vervang nie jou mediese fonds nie; dit voeg net ’n ekstra laag beskerming by wanneer mediese kostes hoër is as wat jy verwag het.

Hoe dit werk:

1. Jy ontvang behandeling.
2. Jou mediese fonds betaal ’n gedeelte van die rekening. Waar jou mediese fonds dalk 100% van die mediesefondstarief vir die behandeling dek, kan die rekening vir jou behandeling twee of drie keer meer as die mediesefondstarief wees.
3. Gapingsdekking betaal die verskil. As jy gapingsdekking het, dek dit die verskil tussen die mediesefondsdekking en die koste van die behandeling.

As jy ’n mediese fonds het, kwalifiseer jy vir gapingsdekking

Gapingsdekking is beskikbaar vir individue, ongeag hul ouderdom, en gesinne wat lede is van ’n mediese fonds. Die meeste gapingsdekkingplanne het bekostigbare maandelikse premies, wat dit ’n koste-doeltreffende manier maak om jouself teen groot, onverwagte mediese rekeninge te beskerm.

Hoewel voordele kan wissel na gelang van die verskaffer, sluit die meeste gapingsdekkingplanne dekking vir die volgende in:

• Hospitaaltekorte: Betaal die tekort wanneer jou hospitaalrekening die mediesefondstarief oorskry.
• Spesialisfooie: Dek die verskil tussen spesialiste se fooie en die bedrag wat jou mediese fonds betaal.
• Bybetalings: Help jou om koste wat jy self moet dra, soos bybetalings vir sekere behandelings of skanderings, te betaal.
• Sekere prosedures: Sommige gapingsdekkingplanne sluit dekking in vir spesifieke prosedures, soos tandheelkundige chirurgie of kankerbehandeling.

Wat gapingsdekking NIE is nie

• Nie ’n plaasvervanger vir mediese fonds nie. Jy moet ’n aktiewe mediesefondsplan hê om vir gapingsdekking te kwalifiseer.
• Nie onbeperk nie. Gapingsdekking het limiete, so dis belangrik om die besonderhede van jou plan na te gaan om seker te maak jy weet wat dit dek.
• Nie duur nie. Gapingsdekking is ontwerp om bekostigbaar te wees en beskerming te bied sonder om jou sak te ruk.

Gemoedsrus dat jy die behandeling kan kry wat jy nodig het

Gapingsdekking help dat jy op jou behandeling of herstel kan fokus sonder om oor onverwagte mediese koste te bekommer. Dis ’n slim en bekostigbare keuse om jouself en jou finansies te beskerm wanneer jy met groot rekeninge sit ná hospitalisasie of duur behandeling.

Mediese uitgawes kan erge finansiële spanning veroorsaak. Gapingsdekking help om die las te verlig. Deur die verskil tussen dit wat dokters vra en die bedrag wat mediese fondse betaal te oorbrug, verseker gapingsdekking dat jy finansieel beskerm is wanneer jy dit die nodigste het.