ʼn Gids vir tieners se sosialemediagebruik

Die dae toe dit normaal was vir tieners om tot die straatligte aankom op hul fietse saam met vriende te wees, is lankal verby. Vandag het tieners se sosiale interaksies na digitale skerms verskuif. Hier kan tieners in kontak met vriende bly, op hoogte bly met neigings, en vermaaklike inhoud kan kry – alles vanuit die gemak van hul huise.

Sosiale media hou wel voordele in. Dit help tieners om hulself uit te druk, by gemodereerde kletsforums kan hulle openlik oor onderwerpe soos geestesgesondheid praat en maak dit moontlik vir tieners om by hul portuurgroep te leer. En op baie maniere voel ouers vertroos met die wete dat hul kinders tuis en veilig is.

Maar sosiale media kom nie sonder uitdagings vir ouers nie. In 'n 2023-studie deur Media Monitoring en UNICEF kan tieners in Suid-Afrika nie 'n dag sonder sosialemedia-apps deurbring nie en baie sê dat dit moeilik is om op te hou as hulle eers begin blaai. Baie spandeer twee of meer ure elke dag op een platform.

Daarom is dit belangrik om die impak van sosiale media op jou tiener te verstaan. Deur jouself met kennis toe te rus en ondersteunende strategieë te implementeer, kan jy jou kind deur die kompleksiteite van die gebruik van sosiale media lei, terwyl jy gesonde grense en verhoudings bevorder.

Verstaan die risiko's vir tieners

Dit is nodig om oop te wees wanneer daar oor skermtyd gekommunikeer word. Te veel skermtyd veroorsaak dat tieners se aktiwiteitsvlakke baie laag is, huiswerk afgeskeep word en in-persoon vriendskappe ly. Al hierdie faktore dra by tot 'n kind se geestesgesondheid. Hier is 'n paar areas van kommer:

1. Sosiale media word gekenmerk deur geredigeerde beelde van bekendes. Hulle stel onrealistiese skoonheidstandaarde vir tienermeisies. Dit kan 'n negatiewe impak op hul selfbeeld hê, wat dikwels lei tot liggaamsontevredenheid en selfs liggaamsdismorfiese versteuring.

2. Aanlyn platforms kan teelaarde wees vir kuberafknouery. Kwetsende opmerkings, skinderpraatjies en persoonlike aanvalle het 'n groot impak, en tieners is veral kwesbaar vir kuberafknouery. Dit kan erge emosionele nood, angs en depressie veroorsaak.

3. Studies toon 'n korrelasie tussen die oorgebruik van sosiale media en verhoogde angs en depressie by tieners. Vrees om uit te mis (FOMO), aanlyn teistering en 'n konstante behoefte aan goedkeuring van buite partye kan almal geestesgesondheidskwessies veroorsaak.

4. Sosialemedia-verslawing lei tot oormatige skermtyd, veral voor slaaptyd. Dit kan slaappatrone ontwrig en slaapkwaliteit beïnvloed, wat 'n nadelige uitwerking op geestesgesondheid het. Volgens die Kanadese Pediatriese Vereniging se Adolescent Health Committee het tieners meer slaap nodig omdat hulle in 'n tydperk van vinnige fisiese, intellektuele en emosionele groei is. Alhoewel genoeg slaap dalk nie vir hulle belangrik lyk nie, toon mediese navorsing dat dit die sleutel tot gesonde ontwikkeling is.

Beskerm jou tiener

Hier is 'n paar strategieë om tieners teen die bedreigings van die digitale era te beskerm:

1. Praat met jou kind oor hul sosialemedia-ervarings. Voer eerlike gesprekke oor die uitdagings wat hulle in die gesig staar, en luister na hul bekommernisse.

2. Stel duidelike reëls en beperkings op skermtyd en sosiale media-gebruik vas. Moedig hulle aan om gereelde pouses van hul toestelle te neem. Laat hulle aan stokperdjies en sport deelneem, of tyd saam met familie en vriende te spandeer.

3. Wees 'n rolmodel. Wees bedag op jou eie sosialemediagewoontes en maak seker jy stel ’n positiewe voorbeeld vir jou tiener. Wys hulle dat die lewe lekker en vervullend buite die virtuele wêreld kan wees.

4. Hou hulle aanlyn aktiwiteit dop, maar doen dit met respek vir hul privaatheid. Gebruik ouerbeheerprogramme en -apps om jou te help om hulle teen skadelike inhoud en potensiële kuberafknouery te beskerm.

5. Help jou tiener om hul eiewaarde en selfvertroue te bou. Om in 2024 goedkeuring op sosiale media te soek, is nie die beste ding om 'n tiener om te doen nie. Moedig hulle aan om hul vaardighede, talente en belangstellings aflyn te ontwikkel.

6. Leer hulle om te dink oor wat hulle sien en lees: Help hulle om die belangrikheid van kritiese denke en mediageletterdheidsvaardighede te verstaan. Help hulle om die inhoud wat hulle aanlyn teëkom, te bevraagteken en te ontleed. Leer hulle om te onderskei tussen werklikheid en inhoud wat so geredigeer is dat dit 'n verwronge siening van die werklikheid skep.

7. Moedig werklike verbindings aan: Aangesig-tot-aangesig interaksies met vriende en familie help om die afhanklikheid van sosiale media vir sosiale vervulling te verminder.

Lei hulle veilig in die digitale era

Dit is belangrik om jou tiener te help verstaan dat jy daar is om hulle te ondersteun deur die op- en afdraandes van hul sosialemedia-ervarings. Moedig oop, oordeelvrye kommunikasie aan sodat hulle gemaklik is om hul ervarings en bekommernisse te deel. Luister aktief na hul bekommernisse en bevestig hul gevoelens, bied gerusstelling en leiding waar nodig.

Wanneer jy grense op skermtyd stel, betrek hulle by die proses sodat hulle voel dat hulle deel was van die besluit. Herinner hulle daaraan dat hul welstand jou topprioriteit is en dat hul waarde nie gedefinieer word deur reaksies op sosiale media nie.

Deur saam te werk en aktief betrokke te bly by hul digitale lewens, kan jy jou tiener help om die veerkragtigheid en selfvertroue te ontwikkel wat nodig is om veilig te bly in vandag se digitale landskap.