Peuters het ’n onblusbare nuuskierigheid en dors na ontdekking. Dit is fassinerend om te aanskou, maar wanneer die entoesiasme hulle water toe lok – hetsy dit ’n swembad, ’n bad, die see, of selfs ’n vlak poeletjie is – is dit uiters belangrik om te weet hoe om hulle in hul nuuskierigheid te beskerm.

Natasha Wallis is ’n gekwalifiseerde swemafrigter, branderplanklewensredder, en eienaar van die Aqua-Heroes Swimming Academy in Witrivier. Sy sê: “Verdrinking bly een van die hoofoorsake van onnatuurlike sterftes onder peuters. Tóg is dit ’n tragedie wat voorkom kan word. Daarom kan dit nie oorbeklemtoon word hoe belangrik dit is om kinders so vroeg as moontlik van waterveiligheid te leer nie.”

Natasha deel ’n paar wenke om ouers te help om hulle peuters veilig te hou wanneer hierdie klein mensies hulle toontjies in die wonderlike wêreld van waterpret begin waag.

Wenk #1
Die eerste veiligheidsreël vir peuters rondom water is ononderbroke toesig. Sorg dat kinders nooit op hulle eie in die bad of by ’n swembad of enige ander watermassa nie. Maak seker daar is altyd ’n verantwoordelike volwassene wat ’n wakende oog hou en in ’n noodgeval blitsig kan optree.

Wenk #2

Jy kan jou baba van so vroeg as een week oud af van waterveiligheid begin bewus maak. Babas het natuurlik ’n duikrefleks om hulle teen verdrinking te beskerm. Wanneer ’n baba in water gedompel word, is die instinktiewe oorlewingsrefleks om hulle asem op te hou en oë oop te maak. Jy kan dieselfde reaksie uitlok deur liggies oor jou baba se gesig te blaas.

Wanneer jy jou baba bad, neem ’n nat, louwarm waslap en druk die water oor jou baba se koppie uit. Sê: "Een, twee, drie, onder" en blaas liggies oor jou baba se gesig. Die refleks tree in werking, en jy leer jou baba om die gevoel van water met die opdrag te vereenselwig. Wanneer hierdie refleks rondom ses maande verdwyn, het jy reeds met wateropleiding begin.

Help hulle om gemaklik en vrymoedig om water te wees. Jy hoef nie noodwendig ’n swembad vir wateropleiding te hê nie; maak ’n krat of houer vol water en sit veilige voorwerpe uit jou kombuis daarin. Laat kinders verken, maar wees altyd net ’n armlengte weg. Gooi die water uit wanneer speeltyd verby is.

Wenk #3
Afrigting vir kleintjies

Om peuters vir gestruktureerde swemlesse by ’n professionele afrigter te neem, kan ’n transformerende ervaring wees. Die lesse kweek bekendheid en gemak met water, en basiese wateroorlewingsvaardighede word geleer. Afrigting deur ’n instrukteur leer peuters om te dryf, te skop, en uit die water te kom. Afrigting dien ’n tweeledige doel: om noodsaaklike lewensvaardighede te bou en van ’n jong ouderdom af ’n positiewe verhouding met water te kweek. Dit bevorder ook ’n positiewe gevoel teenoor water en veiligheid, wat die kind se verantwoordelikheid ’n avontuur eerder as ’n beperking maak en ’n veilige benadering tot wateromgewings verseker. Soos wat hulle groei en ontwikkel, kan wateropvoeding saam met hulle ontwikkel. Dit moet hulle ’n breër begrip gee van die gevare daarvan om by onbekende watermassas in te spring of duik, die krag van water, en dat dit belangrik is om waarskuwingstekens te lees.

Afrigting vir ouers
Oueropleiding is ’n belangrike hoeksteen van waterveiligheid vir peuters. As ’n verdrinking plaasvind, is dit noodsaaklik om vinnig op te tree! Om goed ingelig te wees oor moontlike gevare, noodprosedures, en KPR-tegnieke (kardiopulmonêre resussitasie), stel jou in staat om vinnig en effektief op te tree in ’n noodgeval en ’n lewe te red. As jy ’n ouer is wat nie kan swem nie, maak seker jy leer.

Afrigting vir oppassers
Indien ’n oppasser of huishulp na jou kind omsien waar daar ’n swembad of oop watergebied is, oorweeg dit om hulle ook vir swemlesse te neem. Dit gee gemoedsrus om te weet hulle kan swem en weet wat om te doen om jou kind se lewe te red as die kind in die water sou val.

Wenk #4
Indien jy ’n partytjie hou of jou kinders ’n partytjie bywoon, is dit noodsaaklik dat daar duidelike reëls vir die waterpret moet wees en basiese waterveiligheidsbeginsels toegepas moet word. Die volgende moet altyd geld:

• ’n Streng "geen hardloop"-reël om die swembad-area, omdat nat oppervlaktes glad kan wees en kinders kan laat gly en val;
• Minstens een waterwag – iemand wat kan swem – om ’n oog op die kleintjies te hou; en
• Noodtoerusting, soos ’n reddingsboei en noodhulpstel, en minstens een verantwoordelike volwassene wat weet hoe om dit te gebruik.

Bêre ook die nommer van ’n nooddiens op jou of die verantwoordelike volwassene se foon indien noodhulp ontbied moet word.

Wenk #5
Buiten ’n veiligheidsheining om die swembad, doen alles wat nodig is om jou swembad-area veilig te maak. Belê in ’n swembadnet of -seil, en selfs kameras, om verdrinking te verhoed. Onthou ook dat dit natuurlik is vir peuters om alles in hulle monde te sit soos hulle die wêreld om hulle leer ken. Verwyder dus alle swembadchemikalieë rondom die swembad-area en tuin om seker te maak dit is buite sig en veilig weggebêre.

’n Leeftyd se waterpret
Terwyl vroeë waterveiligheidsopvoeding die grondslag lê vir veilige wateravonture, is waaksame toesig, duidelike grense, en gestruktureerde swemlesse ook noodsaaklik. Geskikte veiligheidstoerusting, afrigting vir kinders, ouers en oppassers, en ’n positiewe houding dra alles daartoe by om ’n veilige en aangename waterervaring vir jong ontdekkertjies te kweek.